काठमाडौँ, २८ असोज । गण्डकी प्रदेशले शुक्रबार नवौँ राष्ट्रिय खेलकुदको महिला फुटबलमा कर्णाली प्रदेशलाई ३–० ले हराएको छ ।
स्याङ्जाको वालिङमा जारी प्रतियोगितामा गण्डकीले ३३ औँ मिनेटमा शान्ती नेपालीको गोलबाट अग्रता लिएको थियो । ५८ औँ मिनेटमा उदयाले गण्डकीको अग्रता दोब्बर बनाइन् । ६६ औँ मिनेटमा उदयाले व्यक्तिगत दोस्रोे गोल गरेपछि गण्डकीले सहज जित हासिल गरेको हो ।
जितसँगै गण्डकी प्रदेशले समूह ‘सी’मा तीन अंक जोडेको छ । समूह ‘सी’मा चार टिम छन् । गण्डकी र कर्णालीसँगै प्रदेश–१ र सशस्त्र प्रहरी बल (एपीएफ) छन् । समूह ‘सी’मा चार टिम भएकाले विजेता र उपविजेता टिमले सेमिफाइनलमा स्थान बनाउनेछन् । समूह ‘ए’ र ‘बी’मा तीन टिम छन् । ‘ए’ र ‘बी’ दुवै समूहबाट विजेता टोलीले सेमिफाइनलमा स्थान पक्का गर्नेछन् ।
