काठमाडौँ, १४ फागुन । मच्छिन्द्र फुटबल क्लबले अपराजित रहँदै सहिद स्मारक ‘ए’ डिभिजन लिगको उपाधि जितेको छ ।
आज त्रिपुरेश्वरस्थित दशरथ रंगशालामा सम्पन्न लिगको अन्तिम खेलमा पनि सुखद नतिजा निकाल्यो । मच्छिन्द्रले अन्तिम खेलमा विभागीय क्लब एपीएफलाई २–१ ले हरायो । अपराजित रहँदै च्याम्पियन बन्यो ।
एपीएफले तुलनात्मक रूपमा राम्रो खेले पनि हार टार्न सकेन । मछिन्द्रलाई जित दिलाउन अभिषेक गुरुङ र रेजिन सुब्बाले एक/एक गोल गरे । एपीएफका प्रदीप लामाले एक गोल फर्काए । ४२औँ मिनेटमा अभिषेकले गोल गर्दै मच्छिन्द्रलाई सुरुआती अग्रता दिलाएका थिए । ६९औँ मिनेटमा प्रदीप गोल गर्दै खेल १–१ को बराबरीमा ल्याए । ८१औँ मिनेटमा रेजिनले गोल गर्दै मत्छिन्द्रलाई २–१ को जित दिलाए ।
अन्तिम केही मिनेट दुवै टोली १० खेलाडीमा समेटिएका थिए । ८६औँ मिनेटमा मच्छिन्द्रका सोनाम भुटिया र एपीएफका आवास लामिछानेले दोहोरो पहेँलो कार्डसहित रातो कार्ड पाएपछि दुवै टोली १० खेलाडीमा समेटिएका हुन् । जितसँगै मच्छिन्द्रले १३ खेलबाट ३५ अंक जोडेर लिग सकायो । एपीएफले १५ अंक जोड्यो । एपीएफ आठौँ स्थानमा रह्यो ।
