एजेन्सी, ३१ असोज । ह्वाइट हाउसकी प्रेस सेक्रेटरी केटी जकारियाले आफ्नो पदबाट राजीनामा दिएकी छिन् । पद सम्हालेको पाँच दिनभित्रै उनको राजीनामा आएको बीबीसीले पुष्टि गरेको छ ।
उनको पहिलो सार्वजनिक प्रस्तुति विवादास्पद बनेपछि उत्पन्न दबाबका कारण उनले पद छाड्नुपरेको समाचारमा उल्लेख छ । शुक्रवार उनको राजीनामाको खबर बाहिरिनु केही समयअघि मात्रै राष्ट्रपति डोनाल्ड ट्रम्पले पत्रकारहरूसँग कुरा गर्दै आफूले उनलाई राजीनामा दिन सुझाव दिएको बताएका थिए।
गत मङ्गलवार प्रेस सेक्रेटरीको रूपमा आफ्नो पहिलो पत्रकार सम्मेलनमा जकारियाले १५ मिनेटभन्दा कम समय बिताएकी थिइन् जसमा उनले पत्रकारहरूको जम्मा तीनवटा प्रश्नको मात्र जवाफ दिएकी थिइन्।
उनको यो प्रस्तुति निकै आलोचित बनेको थियो। त्यसपछिका दिनहरूमा उनले आफ्नो योग्यता र तयारीको विषयलाई लिएर सञ्चारमाध्यमबाट आएका कडा प्रश्नहरूको सामना गर्नुपरिरहेको थियो।
शुक्रवार दिउँसो ‘मरीन वन’ बाहिर पत्रकारहरूसँग कुरा गर्दै राष्ट्रपति ट्रम्पले उनको आसन्न बहिर्गमनको संकेत दिएका थिए। ट्रम्पले भने, ‘मैले सोधेँ, ‘के यो तिम्रो लागि ठीक छ, केटी ? किनकि इमानदारीपूर्वक भन्नुपर्दा, तिमीलाई यसको आवश्यकता छैन।’ उनले जकारियामाथि मिडियाले धेरै नराम्रो व्यवहार गरेको आफूलाई लागेको समेत बताएका थिए । त्यसको केही घण्टापछि उनले पद छाडेकी हुन् ।
