एजेन्सी, २९ असोज । माल्दिभ्सले विभिन्न क्षेत्रमा विदेशी लगानीसम्बन्धी नियम कडा बनाएको छ ।
संशोधित व्यवस्थाअनुसार निर्माण, घरजग्गा, लेखापरीक्षण र सूचना प्रविधिसम्बन्धी निश्चित क्षेत्रमा विदेशी लगानीका लागि कम्तीमा २५ प्रतिशत स्थानीय स्वामित्व अनिवार्य गरिएको छ। केही व्यवसाय भने माल्दिभियन नागरिकका लागि मात्र सुरक्षित राखिएका छन् ।
आर्थिक विकास, यातायात तथा व्यापारमन्त्री मोहम्मद सइदका अनुसार १५ मिलियन अमेरिकी डलरभन्दा कम मूल्यका निर्माण परियोजना र १०० मिलियन डलरभन्दा कम मूल्यका घरजग्गा परियोजनामा विदेशी लगानी गर्न माल्दिभियन नागरिकको कम्तीमा २५ प्रतिशत हिस्सेदारी हुनुपर्नेछ । लेखापरीक्षण र सूचना प्रविधि सेवामा पनि यही नियम लागू हुनेछ ।
त्यस्तै, १०० मिलियन डलरभन्दा कम मूल्यका आवासीय घरजग्गा परियोजना तथा सामान्य समुद्री यातायात सेवाका केही गतिविधि माल्दिभियन नागरिकका लागि मात्र सुरक्षित राखिएका छन् ।
सन् २०२४ मा लागू भएको विदेशी लगानी ऐनअनुसार ल्याइएको नयाँ व्यवस्थाले करिब १५० विदेशी लगानीमा सञ्चालित व्यवसायलाई समेट्ने मन्त्री सइदले बताएका छन् ।
