काठमाडौँ, १९ असोज । कालीमाटी तरकारी बजारमा भित्रिएको काँक्रोमा अत्यधिक मात्रामा विषादी भेटिएको छ ।
कालीमाटी फलफूल तथा तरकारी बजार विकास समितिका अनुसार धादिङको थाक्रे नगरपालिकाबाट बिक्रीका लागि आज कालीमाटी बजार ल्याइएको काँक्रोमा ४९.१९७० प्रतिशत ‘अर्गानोफस्फेट’ नामक विषादी भेटिएको हो ।
केन्द्रीय कृषि प्रयोगशालाले आज कालीमाटी तरकारी बजारका १० पसलको १० थरी तरकारी तथा फलफूल परीक्षण गरेको थियो । परीक्षण क्रममा काँक्रोमा उक्त मात्रामा विषादी भेटिएको हो । विषादीको मात्रा धेरै भेटिएको उक्त काँक्रो उपभोग अयोग्य रहेको जनाइएको छ ।
सरकारले रोकावट प्रतिशत दर ३५ भन्दा कम हुँदा उपभोगयोग्य मानेको छ । ३५ देखि ४५ प्रतिशत पाइए केही दिन राखेर मात्रै उपभोग गर्न सकिने मापदण्ड बनाएको छ । यस्तै ४५ प्रतिशतभन्दा बढी भयो भने त्यस्ता तरकारी उपभोगका लागि अयोग्य मानिएको छ ।
