काठमाडौँ, ३० भदौ । न्यायपरिषद्ले उच्च अदालतमा तीनजना न्यायाधीशको नाम सिफारिस गरेको छ ।
न्यायपरिषद्ले सर्वोच्च अदालतका रजिष्ट्रार भद्रकाली पोखरेललाई न्यायाधीशको सिफारिससहित उच्च अदालत सुर्खेतमा पदस्थापनाका लागि सिफारिस गरेको छ ।
जिल्ला अदालत कास्कीका न्यायाधीश हिमलाल बेल्बासे पनि उच्च अदालतको न्यायाधीशमा सिफारिस भएका छन् । उनी उच्च अदालत जनकपुरको पदस्थापनाका लागि सिफारिस भएका हुन् ।
फैसला कार्यान्वयन निर्देशनालयका महानिर्देशक गजेन्द्रबहादुर सिंह पनि न्यायाधीशमा सिफारिस भएका छन् । उनी उच्च अदालत विराटनगरमा पदस्थापना हुनेछन् ।
न्यायपरिषदको बैठकले तीन जना सहसचिवहरू ठगीन्द्र कट्टेल, रामप्रसाद भट्टराई र बाबुराम दाहाललाई सचिवमा बढुवा गरेको छ । कट्टेल र दाहाल सर्वोच्च अदालतको रजिष्ट्रार हुनेछन् भने भट्टराई न्यायपरिषदको सचिव बन्नेछन् ।
