काठमाडौँ, २३ भदौ । गृहमन्त्री सुधन गुरुङले पुराना दलहरूलाई सुध्रन चेतावनी दिएका छन् ।
आज जेनजी सहिद दिवसको अवसरमा काठमाडौँमा आयोजित कार्यक्रमलाई सम्बोधन गर्दै पुराना दल र नेताहरूले अझै पनि जेनजी आन्दोलनलाई अपमान गरिरहेको भन्दै सुध्रन चेतावनी दिएका हुन् ।
साथै उनले आन्दोलनलाई अपमान गर्नु ३ करोड नेपालीको अपमान गर्नुजस्तै रहेको बताए । आफूलाई चिल्ला भाषण गर्न नआउने भन्दै मन्त्री गुरुङले भने, ‘अझै पनि पुराना दलका साथीहरूले विभिन्न तरिकाले व्याख्या गरेको देख्दा अचम्म लाग्छ र भन्न चाहन्छु त्यो दिन इतिहास कसैले फेरेर फेरिँदैन ।’
उनले इतिहास फेर्ने कोसिस नगर्न आग्रह गर्दै भने,‘आन्दोलनलाई अपमान गर्नु तीन करोड नेपालीलाई अपमान गर्नु हो । त्यसैले सुध्रिनुस् अझै समय छ ।’ ‘न सत्ताको लोभ नै छ र शक्तिको घमण्ड नै’, ‘अहिले पनि छैन र त्यतिवेला पनि थिएन । सुशासनको पक्षमा उभिन मात्र युवा एकै ठाउँमा जम्मा भएका थियो । तर शान्तिपूर्ण आन्दोलनलाई दमन गरियो । गोली हानियो ।’
