एजेन्सी, १४ भदौ । नाइजरको राजधानी नियामेस्थित एक सैन्य अखडामा शनिबार सेनाको एक समूहले आफ्नै वरिष्ठ अधिकारीहरूविरुद्ध विद्रोह गर्दै गोलीबारी र शृङ्खलाबद्ध विष्फोट गराएका छन् ।
भूमध्यसागरीय तथा साहेल क्षेत्रमा रहेको यो रणनीतिक सैन्य अखडा, मुख्य अन्तर्राष्ट्रिय विमानस्थल र राष्ट्रपति भवन नजिकका प्रशासनिक क्षेत्रहरूमा शनिबार बिहानैदेखि गोली र धमाकाको आवाज सुनिएको बताइएको छ ।
नाइजरका रक्षामन्त्री जनरल सालिफु मोडीका अनुसार केही विद्रोही सैनिकहरूले अड्डाभित्र आफ्नै अधिकारीहरूलाई बन्धक बनाएर संवेदनशील स्थानहरूमा अन्धाधुन्ध गोली चलाएका थिए । सरकारले यसलाई सैन्य अनुशासन र नियमको गम्भीर उल्लङ्घन भनेको छ ।
रक्षा मन्त्रालयका अनुसार सुरक्षा बलले विद्रोहलाई दबाएर स्थिति पूर्ण रूपमा नियन्त्रणमा लिइसकेको छ । डिओरी हामानी अन्तर्राष्ट्रिय विमानस्थल वरपर सुरक्षा कडा पारिएको छ भने प्रमुख सडकहरू सिल गरिएको छ ।
घटनाका क्रममा राष्ट्रिय प्रसारण संस्थाको लाइभ प्रसारण केही घण्टाका लागि रोकिए पनि पछि पुनः सुचारु भएको छ । सत्तारूढ सैन्य काउन्सिलले जनतालाई शान्त र एकजुट रहन अपिल गरेको छ ।
