काठमाडाैँ, ११ भदाै । परराष्ट्रमन्त्री शिशिर खनाल र बङ्गलादेशका परराष्ट्रमन्त्री डा.खलिलुर रहमानबिच टेलिफोन वार्ता भएको छ ।
टेलिफोन वार्ताका क्रममा दुई परराष्ट्रमन्त्रीहरुले नेपालमा बुधबार आएको विपतपछि जारी खोज, उद्धार तथा राहत कार्यका विषयमा छलफल गरेका छन् ।
विदेशमन्त्री रहमानले नेपालको विपतकाे यस घडीमा बङ्गलादेश साथमा रहेको र हरेक प्रकारको सहयोग गर्ने तयार रहेको प्रतिबद्धता जनाएका छन् ।
परराष्ट्रमन्त्री खनालले नेपाललाई आवश्यक सहयोग गर्न प्रस्ताव गरेको बङ्गलादेश सरकारलाई धन्यवाद व्यक्त गर्दै सहयोगका विषयमा नेपालले बङ्गलादेशसँग निकट समन्वय कायम राख्ने बताएका छन् ।
नेपालमा बुधबार भएको विपद्का कारण प्रभावित क्षेत्रमा खोज, उद्धार तथा राहत कार्य जारी रहेका बेला दुई देशका परराष्ट्र मन्त्रीबिच उक्त टेलिफोन वार्ता भएको हो ।
