काठमाडौँ, ८ भदौ । सङ्घीय संसदअन्तर्गत प्रतिनिधि सभा र राष्ट्रिय सभाका विभिन्न पाँचवटा संसदीय समितिहरूको बैठक आज बस्ने भएका छन् ।
प्रतिनिधि सभाको कृषि तथा प्राकृतिक स्रोत समितिको बैठक बिहान ९:३० बजे बस्ने तय भएको छ। बैठकमा कृषि, वन तथा पर्यावरण मन्त्रालयद्वारा गठित मानव-वन्यजन्तु द्वन्द्व व्यवस्थापन प्राविधिक कार्यदलले तयार पारेको प्राविधिक प्रतिवेदनमाथि छलफल हुनेछ ।
अन्तर्राष्ट्रिय सम्बन्ध र पर्यटन समितिको सोह्रौँ बैठक बिहान ११:०० बजे सिंहदरबारस्थित समितिको कक्षमा बस्दै छ। बैठकमा ‘पर्यटन विधेयक, २०८१’ का सम्बन्धमा नेपाल पर्वतारोहण सङ्घलगायतका सरोकारवाला निकायहरूसँग छलफल गर्ने कार्यसूची रहेको छ।
पूर्वाधार विकास समितिको ११औँ बैठक बिहान १०:०० बजे सिंहदरबारस्थित समितिको बैठक कक्षमा बस्नेछ। पूर्वाधार विकास र सार्वजनिक निजी साझेदारी विषयमा केन्द्रित रहने उक्त बैठकमा लगानी बोर्डको कार्यालय, नेपाल उद्योग वाणिज्य महासङ्घ, नेपाल चेम्बर अफ कमर्स, नेपाल उद्योग परिसङ्घ र नेपाल-इन्डिया चेम्बर अफ कमर्स एन्ड इन्डस्ट्रीका प्रतिनिधिहरूलाई बोलाइएको छ।
राष्ट्रिय सभातर्फ विधायन व्यवस्थापन समितिको बैठक दिउँसो १ बजे सिंहदरबारमा बस्नेछ। बैठकमा ‘संक्रामक पशु रोग (नियन्त्रण) विधेयक, २०८३’ माथि सैद्धान्तिक छलफल हुनेछ। यसका लागि कृषि, वन तथा पर्यावरण मन्त्रीसहित सोही मन्त्रालय र कानुन, न्याय तथा संसदीय मामिला मन्त्रालयका सचिवहरूलाई आमन्त्रण गरिएको छ।
सार्वजनिक नीति तथा प्रत्यायोजित विधायन समितिको ३४४औँ बैठक दिउँसो २ बजे बस्दै छ। उक्त बैठकमा विषय विज्ञ धन प्रसाद लामिछानेसँग खर्क नीतिका सम्बन्धमा छलफल गरिने कार्यसूची रहेको छ।
