काठमाडौँ, ४ भदौ । नेपाली कांग्रेस केन्द्रीय अनुशासन समितिको बैठक शुक्रबारका लागि आह्वान भएको छ ।
बैठक भाद्र ५ गते शुक्रबार बिहान ११ः ०० बजे ललितपुरको सानेपास्थित पार्टी केन्द्रीय कार्यालयमा बस्ने तय भएको हो । संस्थापनले पार्टीको १५ औँ महाधिवेशनको कार्यतालिका सार्वजनिक भइसकेको र तल्लो तहका अधिवेशनहरू सुरु हुन लागेको बेलामा अनुशासन समिति बैठक बोलाएको हो ।
बैठकमा पार्टीभित्रको अनुशासन, आन्तरिक मर्यादा र आगामी अधिवेशनहरूका क्रममा पालना गर्नुपर्ने अनुशासनका विषयमा छलफल हुनेछ । उजुरीहरूउपर छानबिन र आवश्यक निर्णय गर्ने पनि बैठकको कार्यसूची रहेको बताइएको छ ।
यता महाधिवेशनको प्रक्रिया रोक्न माग गर्दै निवर्तमान सभापति शेरबहादुर देउवा र निवर्तमान कार्यवाहक सभापति पूर्णबहादुर खड्का सर्वोच्च अदालतमा शुक्रबार नै रिट लिएर जाँदै छन् । त्यही दिन अनुशासन समितिको बैठक बोलाउनुलाई महत्वका साथ हेरिएको छ ।
