काठमाडौँ, १९ साउन । काठमाडौँका छुट्टाछुट्टै दुई स्थानबाट करिब २१ लाख ८१ हजार रुपैयाँ बराबरको धनमाल चोरी भएको छ ।
प्रहरीका अनुसार काठमाडौँ महानगरपालिका-२६ सामाखुसी डेरा गरी बस्ने धादिङ सिद्धलेख गाउँपालिका-२ का ३० वर्षीय बिनोद अर्यालको कोठाबाट सोमबार दिउँसो चोरी भएको हो । उनको कोठाबाट सुन तथा चाँदीका विभिन्न गरगहना समेत गरी करिब ५ लाख ९४ हजार रुपैयाँ बराबरको धनमाल चोरी भएको छ ।
यसैगरी काठमाडौँको तारकेश्वर नगरपालिका-७ फुटुङ बुढाथोकी टोल बस्ने ४२ वर्षीय खेटराज पाण्डेको घरबाट पनि सोमबार दिउँसो चोरी भएको छ । उनको घरबाट सुनका विभिन्न गरगहना र नगदसहित करिब १५ लाख ८७ हजार रुपैयाँ बराबरको धनमाल चोरी भएको हो ।
प्रहरीले चोरीमा संलग्न हाल फरार व्यक्तिहरूको खोजी गर्नुका साथै घटनाका सम्बन्धमा आवश्यक अनुसन्धान गरिरहेको जनाएको छ ।
