काठमाडौँ, १९ साउन । राष्ट्रिय स्वतन्त्र पार्टीका सांसद अमरेशकुमार सिंहले मधेसमा आन्दोलन वा तनाव हुँदा राज्यले सोझै गोली चलाउने प्रवृत्तिको विरोध गर्दै सामाजिक सद्भाव कायम राख्न अपिल गरेका छन् ।
आज प्रतिनिधि सभाको बैठकमा सांसद सिंहले तराई–मधेसमा भएका पछिल्ला हिंसात्मक घटना र राज्यको दमनकारी नीतिप्रति आलोचना गरे ।
उनले अहिलेको राष्ट्रको आवश्यकता सामुदायिक लडाइँ नभई गरिबी, पछौटेपन र असमानता विरुद्धको लडाइँ भएको बताए । उनले सबै समुदायलाई संयमित भई सामाजिक सद्भाव कायम राख्न अपिल समेत गरे ।
सांसद सिंहले राज्यको सुरक्षा नीतिमाथि गम्भीर प्रश्न उठाउँदै मधेसमा हुने कुनै पनि प्रदर्शन वा तनावमा प्रहरीले सोझै गोली चलाउने गरेको आरोप लगाए । उनले भने, ‘मधेसमा जहिले पनि केही हुँदा गोली मात्र किन चल्छ ? त्यहाँ लाठी किन चल्दैन ? अश्रुग्यास किन चल्दैन ? विश्वमा नेपाल बाहेक कतै पनि प्रहरीलाई एसएलआर दिइँदैन, तर यहाँ प्रहरीले सोझै एसएलआरबाट गोली हान्छ ।’
