एजेन्सी, १८ साउन । इण्डोनेसियाको पूर्वी जाभा प्रान्त नजिकै जाभा समुन्द्रमा २ सय ५० जनाभन्दा धेरै यात्रु चढेको जहाजमा आगलागी भएको छ । घटनामा कम्तिमा ५ जनाले ज्यान गुमाएका छन् । ३९ जनाको अवस्था थाहा हुन सकेको छैन ।
सुराबाया खोज तथा उद्धार कार्यालयका अनुसार यो जहाज हिजो पूर्वी जाभाको सुराबायाबाट सुलावेसी टापुमा अवस्थित मकासरका लागि प्रस्थान गरेको थियो । सापुदी टापुबाट झण्डै ३५ किलोमिटर उत्तरतर्फ पुगेका बेला जहाजमा अचानक आगलागी भएको हो ।
जहाजमा रहेका यात्रु ज्यान जोगाउन ब्रिज र जहाजको अघिल्लो भाग अर्थात् (बो) मा जम्मा भएका थिए । त्यस्तै समुद्रमा हाम फालेका दर्जनौँ यात्रुलाई नजिकै रहेका अन्य जहाजले तत्काल उद्धार गरेका समाचार संस्था एपीले जनाएको छ ।
अहिले पनि त्यस क्षेत्रमा खोज तथा उद्धार कार्य भैरहेको छ । आगलागीको कारण खुल्न नसकेको र घटनाबारे अनुसन्धान भइरहेको छ । सन् १९९२ मा जापानमा निर्माण भएको १६० मिटर लामो जहाज सन् २०१५ मा इन्डोनेसियालाई बिक्री गरिएको थियो ।
सत्र हजारभन्दा धेरै टापु रहेको इन्डोनेसियामा जलयात्रा प्रमुख यातायातको माध्यम हो । तर कमजोर सुरक्षा मापदण्डका कारण त्यहाँ बेला–बेलामा यस्ता समुद्री दुर्घटना हुने गरेका छन् ।
