काठमाडौँ, १५ साउन । नेपाल स्टक एक्सचेञ्ज (नेप्से) परिसूचकमा आज सामान्य वृद्धि भएको छ ।
आज बजारमा १२.९६ अंकको वृद्धि देखिए तापनि समग्र साताभरको कारोबारमा भने बजार ओरालो लागेको छ । गत साता २७३४.६० को विन्दुमा बन्द भएको नेप्से परिसूचक यो साताको अन्तिम दिनसम्म आइपुग्दा २६८५.५४ अंकमा सीमित भएको छ । यसरी हेर्दा एक सातामा नेप्सेमा करिब ४९ अंकको गिरावट देखिएको छ । साताको पहिलो चार कारोबार दिन अर्थात् सोमबारदेखि बिहीबारसम्म लगातार घटेको बजारले अन्तिम दिन भने केही राहत दिएको हो ।
तथ्याङ्क अनुसार अन्तिम कारोबार दिन नेप्से परिसूचक १२.९६ अंकले बढेर २६८५.५४ विन्दुमा बन्द भएको छ । आज कुल १८० कम्पनीको सेयर मूल्य बढ्दा ८२ कम्पनीको मूल्य घटेको छ भने १३ कम्पनीको मूल्य स्थिर रह्यो ।
आज बजारमा कुल ३ अर्ब ७५ करोड ९७ लाख २२ हजार ३४० रुपैयाँ बराबरको सेयर कारोबार भएको छ । दिनभरिमा ८८ लाख ५१ हजार कित्ता सेयर किनबेच भएका छन् ।
