काठमाडौँ, १० साउन । नेपालले प्राप्त गर्दै आएको वैदेशिक सहायता प्रतिबद्धता ३९.३ प्रतिशतले घटेको छ ।
अर्थ मन्त्रालयका अनुसार आर्थिक वर्ष २०८१/८२ को पहिलो ११ महिनाको तुलनामा आर्थिक वर्ष २०८२/८३ को सोही अवधिमा वैदेशिक सहायता प्रतिबद्धता घटेको हो ।
गत आर्थिक वर्ष २०८२/८३ को पहिलो ११ महिना अर्थात २०८२ साउन १ गतेदेखि २०८३ जेठ मसान्तसम्मको अवधिमा नेपालले कुल १ खर्ब ३४ अर्ब ८३ करोड रुपैयाँ बराबरको वैदेशिक सहायता प्रतिबद्धता प्राप्त गरेको छ ।
अर्थ मन्त्रालयले जारी गरेको विवरणअनुसार आर्थिक वर्ष २०८२/८३ को पहिलो ११ महिनामा प्राप्त वैदेशिक सहायता प्रतिबद्धतामा ४० अर्ब ८८ करोड रुपैयाँ अनुदान र ९३ अर्ब ९५ करोड रुपैयाँ ऋण रहेको छ ।
अघिल्लो आर्थिक वर्ष २०८१/८२ को पहिलो ११ महिनामा नेपालले २ खर्ब २२ अर्ब रुपैयाँ वैदेशिक सहायता प्रतिबद्धता प्राप्त गरेको थियो । उक्त वर्ष प्राप्त वैदेशिक सहायता प्रतिबद्धतामा ऋण र अनुदानको अंश क्रमसः ६९.७ प्रतिशत र ३०.३ प्रतिशत रहेको थियो ।
