काठमाडौँ, ४ साउन । सरकारले आर्थिक वर्ष २०८२/८३ मा घरजग्गा कारोबारबाट ६० अर्ब ७३ करोड ७२ लाख रुपैयाँ राजस्व उठाएको छ । यो आर्थिक वर्ष २०७९/८० यता सबैभन्दा धेरै हो । आर्थिक वर्ष २०७९/८० मा ४१ अर्ब १५ करोड ७६ लाख रुपैयाँ राजस्व उठेको भूमि व्यवस्थापन तथा अभिलेख विभागको तथ्यांक छ ।
आर्थिक वर्ष २०८०/८१ मा ४२ अर्ब ४२ करोड २ लाख रुपैयाँ राजस्व उठेको थियो । आर्थिक वर्ष २०८२/८३ मा महिनाअनुसार हेर्दा गएको असारमा सबैभन्दा बढी ११ अर्ब ९४ करोड ८९ लाख रुपैयाँ उठेको छ ।
कुल १ लाख ९३ हजार २८ पटक घरजग्गा कारोबार भएको थियो । साउनदेखि २.५ प्रतिशत पुँजीगत लाभकर वृद्धि हुने र कित्ताकाट पनि रोकिने भएकाले असारमा घरजग्गा कारोबार बढेको व्यवसायी बताउँछन् । चालु आर्थिक वर्षको बजेटमार्फत सरकारले घरजग्गाको स्वामित्व पाँच वर्ष वा सोभन्दा बढी कायम भएको सम्पत्ति बिक्रीबाट नाफा कमाए साढे ७ प्रतिशत पुँजीगत लाभकर तिर्नुपर्ने व्यवस्था गरेको छ । यसअघि पाँच प्रतिशत थियो । पाँच वर्षभन्दा कमको स्वामित्व भएको घरजग्गा कारोबारमा १० प्रतिशत पुर्याइएको छ । यसअघि ७.५ प्रतिशत थियो । १ साउनयता यो कर कार्यान्वयनमा आइसकेको छ ।
