एजेन्सी, २ साउन । अमेरिकी सेन्ट्रल कमान्डले इरानमाथि लगातार सातौँ रात हवाई आक्रमण गरेको छ ।
यसपटक इरानका निगरानी केन्द्र, सैन्य लजिस्टिक पूर्वाधार, भूमिगत हतियार भण्डार तथा समुद्री सैन्य क्षमतालाई लक्षित गरी लडाकु विमान, ड्रोन र युद्धपोत प्रयोग गरिएको अमेरिकाले जनाएको अलजजिराले जनाएको छ ।
प्राप्त विवरणअनुसार आक्रमण इरानका दक्षिणी सहर लार, जास्क, सिरिक, बुशेहर, बन्दर अब्बास, केश्म टापु, अहवाज तथा मध्य इरानको याज्द सहरमा गरिएको थियो ।
इरानी सरकारी सञ्चारमाध्यमका अनुसार होर्मुज जलमार्गसँग जोडिएको होर्मोज्गान प्रान्तमा भएका आक्रमणमा कम्तीमा तीनजनाको मृत्यु भएको छ । आठजना घाइते भएका छन् ।
इरानी सञ्चारमाध्यमले आक्रमणका क्रममा विद्युत् पूर्वाधार तथा नुनिलो पानीलाई पिउने पानीमा रूपान्तरण गर्ने डिसालिनेसन संयन्त्रमा पनि क्षति पुगेको जनाएको छ ।
अमेरिकी रकेटहरूले जास्क काउन्टीको तटीय बुन्जी गाउँस्थित डकमा रहेका पानी आपूर्ति पम्पहरूलाई निशाना बनाएका कारण त्यस क्षेत्रका धेरै गाउँमा खानेपानी आपूर्ति अवरुद्ध भएको छ ।
