एजेन्सी, ३० असार । अमेरिकी राष्ट्रपति डोनाल्ड ट्रम्पले बिहीबार राष्ट्रका नाममा सम्बोधन गर्ने घोषणा गरेका छन् । ट्रम्पले सामाजिक सञ्जाल प्लेटफर्म ट्रुथ सोसलमार्फत अमेरिकी समयानुसार राति ९ बजे राष्ट्रका नाममा सम्बोधन गर्ने जानकारी दिए ।
उनले यसअघि गत अप्रिलमा युद्धसम्बन्धी विषयमा राष्ट्रलाई सम्बोधन गरेका थिए ।
यसैबीच, ट्रम्प प्रशासनले इरानविरुद्ध अमेरिकी सैन्य गतिविधि पुनः सुरु भएको विषयमा अमेरिकी कंग्रेस (संसद्) लाई औपचारिक रूपमा जानकारी दिएको खुलेको छ ।
बीबीसीका अनुसार ट्रम्पले जुलाई १० मा अमेरिकी सिनेटका कार्यवाहक अध्यक्ष सिनेटर चक ग्रास्लीलाई पत्र पठाउँदै जुलाई ७ देखि अमेरिकी सैन्य कारबाही पुनः सुरु भएको जानकारी गराएका थिए ।
पत्रमा ट्रम्पले ती हवाई आक्रमणहरू रक्षात्मक प्रकृतिका रहेको र स्वदेश तथा विदेशमा रहेका अमेरिकी नागरिक तथा अमेरिकाको राष्ट्रिय हितको रक्षाका लागि सञ्चालन गरिएको उल्लेख गरेका छन् ।
अमेरिकाको ‘वार पावर्स रिजोल्युसन’ अनुसार राष्ट्रपतिले कंग्रेसको पूर्वस्वीकृतिबिना सैन्य कारबाही सुरु गरेमा ४८ घण्टाभित्र त्यसबारे कंग्रेसलाई औपचारिक जानकारी गराउनुपर्ने कानुनी व्यवस्था छ ।
यद्यपि, ट्रम्पले बिहीबार हुने राष्ट्रका नामको सम्बोधनमा यही विषय समेट्ने हुन् वा अन्य कुनै विषयमा बोल्ने हुन् भन्नेबारे अहिलेसम्म कुनै आधिकारिक विवरण सार्वजनिक भएको छैन । बीबीसी
