काठमाडौँ, २६ असार । कर्णाली राजमार्गअन्तर्गत दैलेखको चामुण्डाबिन्द्रासैनी नगरपालिका–७, सांगेतरास्थित कर्णाली नदीमा बेपत्ता भएका मध्ये थप दुईजनाको शव बिहीबार साँझ फेला परेको छ । योसँगै दुर्घटनामा मृत्यु भई सनाखत हुनेको संख्या तीन पुगेको छ ।
आफन्तले घटनास्थलमा पुगेर शव बुझिसकेका प्रहरीले जनाएको छ । पहिचान खुल्नेमा यसअघि भीरमा शव फेला परेका कालीकोटको पचाल झरना गाउँपालिका–९ का जेखे तिरुवा, सोही ठाउँका बेपत्ता भनिएका मेखे तिरुवा र कालीकोटकै रास्कोट नगरपालिका–२ की १८ वर्षीया सुजना खड्का छन् । उनीहरूको ठेगाना र विवरण पहिचान भई आफन्तद्वारा सनाखत भइसकेको हो ।
सवारीचालक सुर्खेतको पञ्चपुरी नगरपालिका–८ का तुलाराम सुवेदी र उनका सहोदर भाइ (सहचालक) रामु सुवेदीको अवस्था अझै अज्ञात छ ।
यही असार १८ गते सुर्खेतबाट कालीकोटतर्फ जाँदै गरेको क.प्र. ०२–००१ ख १०५५ नम्बरको फोर्स गाडी सडकबाट करिब ४०० मिटर तल कर्णाली नदीमा खसेको थियो । सशस्त्र प्रहरी बलको गोताखोर टोलीसहितको संयुक्त सुरक्षा निकायले नदी र आसपासका क्षेत्रमा बाँकी बेपत्ताको खोजी जारी राखेको छ ।
