काठमाडौँ, २५ असार । युनाइटेड अरब इमिरेट्स (यूएई)का वैदेशिक व्यापारमन्त्री डा. थानी बिन अहमद अल जेयुदीको नेतृत्वमा आएको प्रतिनिधिमण्डलले परराष्ट्रमन्त्री शिशिर खनालसँग शिष्टाचार भेटवार्ता गरेको छ ।
आज बिहान सिंहदरबारस्थित परराष्ट्र मन्त्रालयमा भएको भेटघाटका क्रममा व्यापार, लगानी, एआई, डिजिटल रूपान्तरण, पर्यटन, श्रम आप्रवासन, पूर्वाधार, नवीकरणीय ऊर्जाका साथै प्राथमिकताका क्षेत्रहरूमा सार्वभौम सम्पत्ति कोषको लगानी वृद्धिसहित पारस्परिक हितका विभिन्न क्षेत्रहरूमा नेपाल र यूएईबीचको द्विपक्षीय सम्बन्धलाई सुदृढ पार्ने बारेमा विचार आदानप्रदान गरेका छन ।
भेटमा परराष्ट्रमन्त्री खनालले नेपालमा विभिन्न परियोजनामा यूएईको लगानी सुनिश्चित गरेर कूटनीतिक सम्बन्धको आसन्न स्वर्णजयन्ती समारोहलाई एउटा प्रमुख कोसेढुंगा बनाउने नेपाल सरकारको चाहना व्यक्त गरेका थिए ।
परराष्ट्रमन्त्री खनालले कन्सुलर सेवा विभागद्वारा प्रमाणीकरण गरिसकेपछि पनि प्रहरी प्रतिवेदनको थप प्रमाणीकरण गर्नुपर्ने आवश्यकतालाई हटाउन यूएई सरकारलाई आग्रह गरेका थिए ।
