काठमाडौँ, १६ असार । नेपाली कांग्रेसका नेता कृष्ण सिटौलाले राज्यका सबै निकायले आफ्नो स्वतन्त्रता गुमाइसकेको बताएका छन् ।
आज काठमाडौँमा आयोजित ‘सङ्घीयता कार्यान्वयनमा प्रदेश संरचना: समसामयिक संवाद’ कार्यक्रममा बोल्दै उनले अहिले राज्य सञ्चालन संविधान बमोजिम चल्न नसकेको टिप्पणी गरे।
उनले देशको प्रशासन, न्यायालय, प्रहरी र अन्य संवैधानिक निकायहरूले आफ्नो स्वतन्त्रता गुमाइसकेको दाबी गर्दै अहिले देश वास्तवमा कसको नियन्त्रणमा छ भन्न समेत गाह्रो रहेको बताए । नेपालमा पछिल्लो समय प्रतिशोधको राजनीति धेरै नै विकसित भइरहेको प्रति चिन्ता व्यक्त गर्दै उनले यस्तो अवस्थाले देश र समाज बन्न नसक्ने उल्लेख गरे।
विश्व राजनीतिको प्रभाव नेपालमा पनि परिरहेको र त्यसको नराम्रो प्रभाव ज्यादा देखिएको उनको धारणा छ । राजनीतिक दलभित्र र विभिन्न राजनीतिक दलहरूको बिचमा अविश्वास दिनप्रतिदिन अझै गहिरिँदै गएको चर्चा गर्दै सिटौलाले दलहरू एक ठाउँमा बसेर देशका बारेमा सोच्ने परिस्थिति नै नरहेको जिकिर गरे।
