नेपाली कांग्रेसका महामन्त्री प्रदीप पौडेलले ‘सय दिनमा सय काम’ कार्यक्रम कार्यान्वयनमा सरकार पूर्ण रूपमा असफल भएको टिप्पणी गरेका छन् ।
शनिबार सिंहदरबारस्थित दलको कार्यालयमा बसेको संसदीय दल कार्यसमिति बैठकपछि सञ्चारकर्मीसँग कुरा गर्दै उनले आफैंले तय गरेका सय कामबारे सरकारले छलफलसमेत नगरेको आरोप लगाए । सरकारले महत्वाकांक्षी घोषणा गर्नुको सट्टा सीमित तर कार्यान्वयनयोग्य लक्ष्य तय गरेर पूरा गरेको भए राम्रो हुने उनको भनाइ थियो ।
महामन्त्री पौडेलले भने, ‘सय दिनमा सय काम भन्नुभयो, त्यो सय काम पूरा हुनु त धेरै परको कुरा हो । ती सयवटा काम जुन उहाँहरू आफैंले तोक्नुभएको थियो, त्यसमा छलफलसम्म पनि भएन । सरकारले सय दिनमा सय काम भन्यो । उहाँहरूले सय दिनमा १० काम भनेर पूरा गरेको भए हुन्थ्यो ।’
महामन्त्री पौडेलले कांग्रेसले सरकारका गतिविधिलाई नजिकबाट नियालिरहेको पनि बताए । महामन्त्री पौडेलले सरकारका कार्यसम्पादनप्रति कांग्रेसले निरन्तर निगरानी गरिरहेको र आवश्यक विषयमा संसद् तथा सार्वजनिक मञ्चमार्फत खबरदारी गरिरहने बताए ।
