एजेन्सी, ३१ जेठ । अमेरिकी राष्ट्रपति डोनाल्ड ट्रम्पले अमेरिका र इरानबीचको युद्ध अन्त्य गर्ने सम्झौतामा आइतबार हस्ताक्षर हुने कार्यक्रम तय भएको बताएका छन् । तर, इरानले भने उक्त समयसीमाप्रति शंका व्यक्त गरेको छ ।
सामाजिक सञ्जालमा गरिएको एक पोस्टमा ट्रम्पले सम्झौतामा हस्ताक्षर भएलगत्तै विश्वको महत्त्वपूर्ण होर्मुज जलमार्ग सबैका लागि खुला हुने बताएका छन् ।
यस सम्झौतामा महत्त्वपूर्ण मध्यस्थकर्ताको भूमिका खेलिरहेको पाकिस्तानले पनि आगामी २४ घण्टाभित्र सम्झौताले अन्तिम रूप पाउने अपेक्षा गरिएको र आफूहरू इलेक्ट्रोनिक हस्ताक्षरको तयारीमा रहेको जनाएको छ ।
ट्रम्पको यो भनाइ आउनुअघि इरानको विदेश मन्त्रालयका प्रवक्ता इस्माएल बाघेईले सम्झौताको समयसीमाबारे सावधानीपूर्वक प्रतिक्रिया दिएका थिए । “समझदारी पत्रमा हस्ताक्षर हुने निश्चित मितिबारे हामीले पर्खेर हेर्नुपर्ने हुन्छ, यद्यपि यो भोलि नै हुने छैन,” उनले भनेका थिए ।
तर, ट्रम्पले आफ्नो सामाजिक सञ्जाल ‘ट्रुथ सोसल’मा लेखेका छन्, “सम्झौतामा भोलि हस्ताक्षर हुने तालिका तय भएको छ र हस्ताक्षर हुनेबित्तिकै होर्मुज स्ट्रेट सबैका लागि खुला हुनेछ ।”
इरानको संवद्र्धित युरेनियमको भण्डारतर्फ संकेत गर्दै ट्रम्पले भने, “उपयुक्त समयमा, जब सबै कुरा शान्त हुनेछ, हामी भित्र गएर न्युक्लियर डस्ट ल्याउनेछौँ र त्यसपछि त्यसलाई नष्ट गरिनेछ ।”
विगत धेरै दशकदेखि पश्चिमा देशहरूले इरानमाथि आणविक हतियार विकास गर्न खोजेको आरोप लगाउँदै आएका छन् । इरानले भने यी आरोप अस्वीकार गर्दै आफ्नो आणविक कार्यक्रम शान्तिपूर्ण उद्देश्यका लागि मात्र रहेको दाबी गर्दै आएको छ ।
