एजेन्सी, ३० जेठ । रुसका राष्ट्रपति भ्लादिमिर पुटिनले हालै युक्रेनले तीव्र पारेका आक्रमणहरूले रुसी अर्थतन्त्र र समाजलाई क्षति पुर्याइरहेको स्वीकार गरेका छन् ।‘युक्रेनले रुसका तेल प्रशोधन केन्द्र, भण्डारण स्थल र पाइपलाइनहरूका साथै क्रिमियामा इन्धन आपूर्तिलाई पनि बढ्दो रूपमा निशाना बनाइरहेको छ’ पुटिनले भनेका छन् ।
शुक्रबार पुटिनले दिएको यो अभिव्यक्ति युक्रेनले पछिल्ला केही सातादेखि रुसी पूर्वाधारमाथि आक्रमण तीव्र बनाएको सन्दर्भमा आएको हो । युक्रेनले अघिल्लो रात रुसको निज्नेकाम्स्कस्थित एक महत्वपूर्ण तेल प्रशोधन केन्द्रमा आक्रमण गरेको दाबी गरेको थियो । तर पुटिनले यी आक्रमणहरूले रुसभित्र विभाजन ल्याउन नसक्ने र अर्थतन्त्र चाँडै पुनःस्थापित हुने दाबी गरे ।
युक्रेनले रुसभित्र गहिराइसम्म रहेका तेल प्रशोधन केन्द्र, इन्धन भण्डारण स्थल र पाइपलाइनहरूमा आक्रमण गरिरहेको छ । यी सबै रुसका तेल तथा ग्यास निर्यातका लागि अत्यन्त महत्वपूर्ण संरचना हुन् । युद्ध लम्बिँदै जाँदा र पूर्वी युक्रेनमा मस्कोको प्रभाव सुस्त बन्दै जाँदा यस्ता आक्रमणहरूको प्रभाव बढ्दै गएको देखिन्छ ।
पुटिनले भने, ‘अर्थतन्त्रको कुरा गर्दा उनीहरूले पक्कै पनि हामीलाई क्षति पु¥याइरहेका छन्, तर हामी छिट्टै फेरि जागिरहेका छौँ ।’ रुसी सरकारी समाचार संस्था तासका अनुसार उनले यी आक्रमणहरूको उद्देश्य समाजमा ‘अव्यवस्था र भ्रम फैलाउनु’ रहेको बताए ।
तर उनले जोड दिए कि यस्ता आक्रमणहरूले ‘समाजलाई विभाजित गर्न वा रुसलाई आर्थिक रूपमा कमजोर बनाउन सफल हुने छैनन्, कम्तीमा उनीहरूले चाहेजस्तो हुने छैन ।’
