काठमाडौँ, २७ जेठ । प्रमुख प्रतिपक्ष दल नेपाली कांग्रेस संसदीय दलका नेता भीष्मराज आङ्देम्बेले नेपालले कसैको भूमि मिचेको छ कि भनेर खोज्दै हिँड्ने सत्ता पक्षका सांसदहरू देखेर आफू लज्जित भएको टिप्पणी गरेका छन् ।
आज प्रतिनिधिसभा बैठकमा बोल्दै उनले मेरो देशले कसैको सीमा मिचेको छैन भनेर हिँड्नुपर्नेमा सत्ता पक्षका केही सांसदहरूले नेपालले भारतको सीमा मिचेको हो भनेर न्वारनदेखिको बल लगाएर दौडीराखेको भन्दै आपत्ति जनाए ।
उनले देश र जनता कसैले पनि नरुचाउने खालको यस्ता हर्कत गर्ने सांसदहरूलाई वीर भक्ति थापाको आत्माले पनि धिकार्ने बताए । उनले लिपुलेक, कालापानी र लिम्पियाधुरा नेपालको भूमि हो भन्ने कुरा दुनियाँलाई थाहा भएको र ती समस्याको समाधान गहन कूटनीतिक सम्वादमार्फत टुंगो लगाउनुपर्ने बताए ।
उनले राष्ट्रिय स्वतन्त्र पार्टी (रास्वपा)का सभापति रवि लामिछानेलाई दिल्लीमा सिमाना ‘स’ र कालापानीको ‘क’ पनि उच्चारण किन नगरेको भनि प्रश्न पनि गरेका छन् ।
उनले सोधे, “उहाँले भन्नुभयो सीमानाबारेमा ढोल बजाएर छलफल हुन सक्दैन भनेर । हो, ढोल बजाएर हुन्न । तर, दिल्लीमा रहँदा सिमाना स अनि कालापानीको क पनि उच्चारण नगरी किन फर्किनुभयो,” ।
आङदेम्बेले प्रधानमन्त्रीको अभिव्यक्तिबारे पराष्ट्रमन्त्रीले भारतमा बोलेकोमा आपत्ति जनाए ।
