एजेन्सी, १८ जेठ । अन्तर्राष्ट्रिय बजारमा सोमबार कच्चा तेलको भाउ बढेको छ ।
अमेरिका र इरानबीच फेरि आक्रमण–प्रत्याक्रमण भएपछि तेल बजारमा दबाब देखिएको हो ।
इजरायलले इरान समर्थित हिज्बुल्लाहविरुद्धको युद्धमा आफ्ना सैनिकहरूलाई लेबनानभित्र अझ अगाडि बढ्न आदेश दिनुले पनि तेल बजारमा त्रास बढ्दा कच्चा तेलको मूल्य २ प्रतिशतभन्दा बढीले बढेको छ ।
ग्रिनविच समयअनुसार बिहान ४ः३६ बजे कच्चा तेलेको अमेरिकी बेञ्चमार्क डब्लुटीआई मूल्य प्रति ब्यारेल २ डलर २९ सेन्ट (२ दशमलव ६२ प्रतिशत)ले बढेर ८९ डलर ६५ सेन्टमा पुगेको थियो । उता, कच्चा तेलको अन्तरराष्ट्रिय बेञ्चमार्क ब्रेन्ट क्रुडको भाउ पनि २ डलर शून्य ५ सेन्ट अर्थात् २ दशमलव २५ प्रतिशतले बढेर प्रतिब्यारे ९३ डलर १७ सेन्टमा पुगेको थियो ।
गत शुक्रबार अमेरिकाले वासिङ्टनमा इजरायल–लेबनान शान्ति वार्ताको आयोजना गरेको केही समयपछि नै युद्धको अवस्था थप चर्किएपछि अमेरिका र इरानबीचको युद्धविराम सम्झौता विस्तार हुने अपेक्षामा कमी आएको छ । युद्धविराम विस्तार हुने आशाले शुक्रबार ब्रेन्ट र डब्लुटीआईको भाउ क्रमशः १ दशमलव ८ प्रतिशत र १ दशमलव ७ प्रतिशतले घटेको थियो ।
