काठमाडौँ, १५ जेठ । कम्बोडिया सरकारले भिसाको समयावधि समाप्त भइसके पनि त्यहाँ बसिरहेका ६०२ नेपालीको जरिबान तथा शुल्क मिनाहा गरेको छ ।
थाइल्यान्डको बैंककस्थित नेपाली दूतावासको अनुरोधमा कम्बोडिया सरकारले नेपालीको जरिबाना शुल्क मिनाहा गरेर उनीहरूलाई स्वदेश फर्कन सहज बनाइदिएको हो ।
थाइल्यान्डका लागि नेपाली राजदूत धनबहादुर वलीका अनुसार भिसा शुल्क मिनाहा गरिएकामध्ये ३०२ नेपाली स्वदेश फर्किन बाँकी छ । सबैलाई नेपाल फर्कन ‘ट्राभल डकुमेन्ट’ उपलब्ध गरिसकेको छ । भिसा शुल्क मिनाहा भएका ३०२ जना नेपाली फर्कन बाँकी छ । यीमध्ये २५० जना फर्कन लागेका छन् । ५२ जना अटेरी गर्दै बसेको बताइएको छ । अबको एकसाता भित्र नफर्के उनीहरूमाथि कम्बोडियाको नयाँ कानुनअनुसार कडा कारबाही हुने राजदूत वलीले बताएका छन।
कम्बोडियामा भिसाको समयावधि समाप्त भइसकेपछि बस्ने विदेशीलाई दिनको १० अमेरिकी डलर जरिबाना गरिन्छ । पछिल्लो केही महिनायता मात्र कम्बोडिया सरकारले नेपालीले तिनुपर्ने आठ करोड रुपैयाँभन्दा बढी जरिबाना मिनाहा गरिसकेको छ ।
