काठमाडौँ, ११ जेठ । सभामुख डोलप्रसाद (डीपी) अर्यालले पूर्वाधार विकासका विषयलाई राजनीतिक स्वार्थसँग जोड्ने प्रवृत्तिको अन्त्य हुनुपर्ने बताएका छन् ।
आज नागार्जुन नगरपालिकाद्वारा आयोजित वार्षिक नीति तथा कार्यक्रमसम्बन्धी छलफल कार्यक्रममा सम्बोधन गर्दै सभामुख अर्यालले सडक, खानेपानीजस्ता आधारभूत आवश्यकताका विषयमा समेत राजनीति गरिनु दुःखद भएको उल्लेख गरे ।
उनले विगतका सरकारहरूले जनताको पक्षमा प्रभावकारी ढंगले काम गरेको भए राजधानीमै आज पनि आधारभूत आवश्यकताको पूर्तिबारे बहस गर्नुपर्ने अवस्था नआउने बताए ।
सभामुख अर्यालले नयाँ सरकार र ताजा जनादेशसहित आएका जनप्रतिनिधिहरूबाट पुराना गलत प्रवृत्ति दोहोरिन नहुने अपेक्षा व्यक्त गर्दै जनमुखी विकास, सुशासन र सेवा प्रवाहलाई प्राथमिकतामा राख्न आग्रह गरे ।
