काठमाडौँ, ८ जेठ । नेपाली फिल्म ‘लालीबजार’ शुक्रबारबाट प्रदर्शनको तेस्रो सातामा प्रवेश गरेको छ ।
गत वैशाख २५ गतेबाट प्रदर्शनमा आएको यो फिल्मले अहिलेसम्म ५ करोड २५ लाख रुपैयाँको ग्रस कलेक्सन गरिसकेको निर्माण कम्पनी षट्कोण आर्ट्सले जनाएको छ । कम्पनीका सीईओ म्याक्स दीपेश खत्रीका अनुसार फिल्मले जेठ ७ गते बेलुकी ११:५९ बजेसम्ममा उक्त ग्रस कलेक्सन गरेको हो ।
निर्माता खत्रीले फिल्मले नेपालभर पाइरहेको माया आफूहरूका लागि अमूल्य रहेको बताएका छन् । आमा र छोरीको कथामार्फत शिक्षाको महत्वलाई दर्साइएको यो फिल्मलाई आम दर्शकले राम्रोसँग बुझेको उनको भनाइ छ । उनले प्रदर्शनको पहिलो साताको तुलनामा दोस्रो सातामा १० प्रतिशत बढी दर्शकले फिल्म हेरेको बताएका छन् ।
