काठमाडौँ, ७ जेठ । नेकपा एमाले सांसद पद्मा अर्यालले पेट्रोलियम पदार्थको मूल्यवृद्धिका कारण सर्वसाधारणको भान्सादेखि ढुवानीसम्म थला परेको बताएकी छन् ।
आजको प्रतिनिधि सभाको बैठकमा अर्यालले चर्को महँगी र मल अभावका कारण आम नागरिक र किसानहरू छटपटिइरहेको भन्दै सरकारको ध्यानाकर्षण गराइन् ।
उनले भनिन्, ‘सङ्कटको बेला अभिभावक बन्नुपर्ने राज्य आफैँ किन व्यापारीजस्तो नाफामुखी बन्दैछ,’ ‘नागरिकहरू आज बजार जाँदा आम्दानी सुकेको र खर्चको पहाड अग्लिएको देखेर छाँगाबाट खसेजस्तै भएका छन् ।’
धान रोपाइँको समय सुरु भइसक्दा पनि किसानले मल नपाएको भन्दै अर्यालले तत्काल मलको व्यवस्था गर्न माग गरिन् । उनले भनिन्, ‘किसानको हातमा बीउ छ, आकाशमा बादल छ, तर खेतमा हाल्ने मल छैन,’ ‘हरेक वर्ष रोपाइँकै बेला मलको हाहाकार हुनु सरकारको योजना विहीनता र लाचारी हो ।’
