काठमाडौँ, ७ जेठ । नेपाली कांग्रेसले निर्वाचन ब्युरोमा १७ सदस्य मनोनीत गरेको छ ।
पार्टी सभापति गगनकुमार थापाले उपसभापति पुष्षा भुसालको संयोजकत्वमा गठित प्रदेश तथा स्थानीय तह निर्वाचनकेन्द्रित कांग्रेस निर्वाचन ब्युरोको सदस्यमा उक्त संख्यामा सदस्यहरू मनोनीत गरेका हुन् । ब्युरोमा मनोनीत हुनेमा जीवन परियार, अब्दुल सत्तार, नानु बास्तोला, सन्दीप राना, वंशलाल तामाङ, प्रकाश तिवारी, महेश ढुंगेल, दीपक महतो, हरि पोखरेल, सुदर्शन आचार्य, रोहित पौडेल, डा. भूमिराज चापागाईं, सिद्धार्थ थापा, नवराज त्रिपाठी, तेजविनोद पौडेल, जगनाथ लामिछाने र मिलनराज बर्तौला रहेका छन् ।
ब्युरोले मतदाता र वस्तुस्थिति विश्लेषण गरी उमेदवार छनोट प्रणाली वैज्ञानिक र तथ्यपरक बनाउने, स्पष्ट र प्रभावकारी निर्वाचन रणनीति तय गर्ने जिम्मेवारी प्राप्त गरेको छ । पार्टीको देशव्यापी निर्वाचन डाटाबेस निर्माण गर्ने, निर्वाचन तयारीलाई तथ्यांक–आधारित र वैज्ञानिक बनाउने, ७५३ स्थानीय तह, ६,७४३ वडा र सात प्रदेशस्तरमा विस्तृत निर्वाचन योजना तयार गर्ने उद्देश्यसहित ब्युरो सदस्य मनोनयन गरिएको कार्यवाहक मुख्यसचिव कृष्णप्रसाद दुलालले बताए । देशव्यापी निर्वाचन डाटाबेस निर्माण, वैज्ञानिक उमेदवार छनोट प्रणाली, मतदाता भावना आधारित घोषणापत्र निर्माण हुने पार्टीको अपेक्षित उपलब्धिहरू छन् ।
