काठमाडौँ, ६ जेठ । आज सेयर बजार दोहोरो अंकले बढेको छ ।
आज बजार ३०.०८ अंक (१.१० प्रतिशत)ले बढेको हो । यससँगै बजार मापक २७५४.४८ विन्दुमा पुगेको छ । अघिल्लो दिन मंगलबार बजार ६.५१ अंकले घट्दा नेप्से २७२४.३९ विन्दुमा झरेको थियो ।
यसदिन हरियाली छाएको सेयर बजारमा ३४६ कम्पनीको कारोबार हुँदा २४९ कम्पनीको सेयर मूल्य बढेको छ । तर, २१ कम्पनीको सेयर मूल्य घटेको छ ।
बुधबार कुल तीन अर्ब ८० करोडको कारोबार हुँदा १ करोड ६ लाख ४० हजार ५०८ कित्ता सेयर किनबेच भयो । अघिल्लो दिनको कारोबारमा तीन अर्ब आठ करोड ७७ लाख ३० हजार ९६२ रुपैयाँ बराबरको सेयर किनबेच भएको थियो ।
बुधबार सबैभन्दा धेरै कमाउने पाँच कम्पनीमा अपर लोहोर खोला हाइड्रोपावर, माउन्टेन्ट हाइड्रोपावर, बुंगल हाइड्रोपावर, शिखर पावर लिमिटेड र सिटी होटल लिमिटेड रहेको छ । यसमध्ये धेरै कमाएको अपर लोहोर खोला हाइड्रोपावरको १५ प्रतिशत सकारात्मक सर्किट लागेको छ ।
