काठमाडौँ, ६ जेठ । नेपाल राष्ट्र बैंकले आज ३० अर्ब रुपैयाँ निक्षेप खिच्दै छ ।
बैंकिङ प्रणालीमा अधिक तरलता कायमै रहेपछि ९१ दिने निक्षेप संकलन उपकरण बोलकबोलमार्फत निक्षेप तान्न लागेको हो । यसअघि, जेठ १ गते ४२ दिनको लागि ४५ अर्ब रुपैयाँ निक्षेप संकलन बोलकबोल तथा निष्कासन भएको थियो ।
केन्द्रीय बैंकको तथ्यांकअनुसार अहिले बैंक तथा वित्तिय संस्थाहरूसँग निक्षेप ७९ खर्ब ७२ अर्ब रुपैयाँभन्दा बढी पुगेको छ । तर, यसबीच कर्जाको माग धेरै कम भएकाले अझै प्रणालीमा अधिक लगानीयोग्य रकम (तरलता) छ । यसले केन्द्रीय बैंकले विभिन्न उपकरण जारी गर्दै प्रणालीबाट रकम खिच्ने गरेको हो ।
आजै दिउँसो ३ गते बोलकबोल हुने निक्षेप संकलन उपकरणको सावाँ तथा ब्याज २०८३ भदौ ३ गते भुक्तानी हुने राष्ट्र बैंकले जानकारी दिएको छ । निक्षेप संकलनको बोलकबोल ब्याजदरमा गर्नुपर्नेछ । जसमा बहुब्याजदरमा पनि बहुबोलकबोल गर्न सकिनेछ ।
