एजेन्सी, ६ जेठ । कङ्गोमा कम्तीमा १३१ जनाको ज्यान लिइसकेको इबोला प्रकोप शुरूमा सोचिएको भन्दा छिटो फैलिरहेको हुन सक्ने विश्व स्वास्थ्य सङ्गठन (डब्ल्यूएचओ) का एक प्रतिनिधिले चेतावनी दिएका छन् ।
एजेन्सीले जति धेरै अनुसन्धान गर्छ त्यति नै सङ्क्रमण अन्य क्षेत्रहरूमा फैलिरहेको पत्ता लागेको डब्ल्यूएचओकी डा. एनी एन्सियाले बताउनुभएको बीबीसीले जनाएको छ ।
अधिकारीहरूले आजसम्म कङ्गोमा ५०० भन्दा धेरै शङ्कास्पद सङ्क्रमित रहेको बताएका छन् भने छिमेकी युगान्डामा एक जनाको ज्यान गएको छ । तर लन्डनमा रहेको एमआरसी सेन्टर फर ग्लोबल इन्फेक्सियस डिजिज एनालिसिसको मोडलिङले ‘पर्याप्त’ पत्ता लगाउन नसकिएको र १ हजारभन्दा धेरै सङ्क्रमित भइसकेका कुरालाई अस्वीकार गर्न नसकिने सुझाव दिएको छ ।
अध्ययनका अनुसार अहिलेको प्रकोप ‘अहिले पत्ता लागेको भन्दा ठूलो’ र यसको ‘वास्तविक परिमाण अनिश्चित’ छ । रेडक्रसले यदि सङ्क्रमितहरू चाँडै पहिचान गरिएन भने इबोला भाइरस द्रुत गतिमा फैलिन सक्ने चेतावनी दिएको छ ।
