काठमाडौँ, २ जेठ । नेपाली राष्ट्रिय क्रिकेट टिमका उपकप्तान दीपेन्द्र सिंह ऐरीले एकदिवसीय अन्तर्राष्ट्रियमा ५० विकेट पूरा गरेका छन् ।
आज क्रिकेट विश्वकप लिग–२ अन्तर्गत अमेरिकाविरुद्ध चार विकेट लिएसँगै दीपेन्द्रले यो कोसेढुंगा पार गरेका हुन् । योसँगै ऐरी नेपालबाट एकदिवसीय अन्तर्राष्ट्रियमा ५० विकेट पूरा गर्ने चौथो खेलाडी बनेका छन् ।
यसअघि राष्ट्रिय टोलीका सन्दीप लामिछाने, करण केसी र सोमपाल कामीले ५० विकेट पूरा गरेका थिए । यी तीनले क्रमशः १४८, ९८ र ९५ विकेट लिएका छन् । ऐरीले ७४ खेलमा ५० विकेट पूरा गरेका हुन् । ५० विकेट पूरा गर्नेक्रममा उनले उक्त खेलमा मिलिन्द कुमार, हर्मित सिंह, नोस्थुस केन्जिगे, शेहन जयसूर्यालाई पभेलियन फर्काए ।
