काठमाडौँ, २९ बैशाख । काठमाडौँ महानगरपालिकाकी कार्यवाहक प्रमुख सुनिता डंगोलले वडाबाट केन्द्रमा आएका सबै फाइल आउँदो हप्ताको सोमबारभित्र शून्य बनाउन निर्देशन दिएकी छन् ।
महानगरको पाक्षिक समीक्षा कार्यक्रममा विभागीय प्रमुख र वडा सचिवहरूसँग छलफल गर्दै डंगोलले प्रक्रिया मिलेका फाइल स्वीकृत गर्न र नमिलेका फाइल भए कारण खुलाएर फिर्ता पठाउन विभागीय प्रमुखहरूलाई निर्देशन दिइन् । साथै, उनले वडामा बजेट खर्च गर्ने नाममा गुणस्तरहीन काम नगर्न र त्यस्ता कार्यक्रम कार्यान्वयन नगर्न वडा सचिवहरूलाई सचेत गराइन् ।
कार्यक्रममा कार्यवाहक प्रमुखले बेरुजु शून्य बनाउने, राजस्व संकलनलाई प्रभावकारी बनाउने र सार्वजनिक जग्गा अतिक्रमण हटाउने कार्यमा सक्रिय हुन आग्रह गरिन् ।
उनले भनिन्, ‘सामाजिक क्षेत्रका तालिमहरूमा एउटै अनुहार दोहोरिने प्रणाली अन्त्य गर्नुपर्छ । सडक बत्ती, भू–प्रशासन र अनलाइन सेवालाई थप चुस्त बनाउनु आवश्यक छ ।’ वडाको सेवाबाटै महानगरको छवि देखिने भएकाले सेवा प्रवाहमा संवेदनशील हुन उनले आग्रह गरिन् ।
