काठमाडौँ, २७ बैशाख । राष्ट्रिय स्वतन्त्र पार्टी (रास्वपा)का सभापति रवि लामिछानेले रास्वपालाई विभिन्न राजनीतिक दल कांग्रेस, एमाले र नेकपाले समेत भोट दिएकाले पार्टी यो हैसियतमा पुगेकाे भन्दै देश झुक्ने काम रास्वपाले नगर्ने बताएका छन् ।
पार्टीबाट प्रतिनिधि सभामा निर्वाचित सदस्यहरूका लागि आयोजित दुई दिने प्रशिक्षण कार्यक्रमलाई आइतबार सम्बोधन गर्दै सभापति लामिछानेले सरकारले हेरेर र सोचेर मात्र कदम चालेको बताएका छन् । सभापति लामिछानेले देश र नागरिकलाई घाटा हुने र अप्ठ्यारो हुने कुनै पनि निर्णय नगर्ने र गर्न नदिइने समेत दाबी गरे ।
उनले भने, ‘कहिलेकाहीँ विभिन्न कोणबाट आएका प्रतिक्रियाहरू, कहिलेकाहीँ समालोचनाहरूले हामीलाई सोच्न बाध्य बनाएको पनि हुनसक्छ । तर तपाईँहरू के निर्धक्क हुनुहोला भने सरकारले सोचेर, हेरेर र विचार गरेर आफ्ना कदमहरू चालिरहेको छ । त्यसकारण सरकारले गरेका कामहरूमा आजका दिनसम्म दुखमनाउ गरेर भाग्न पर्दैन ।’
