काठमाडौँ, २२ बैशाख । राधास्वामी सत्संग व्यास आश्रममा रहेका बालबालिकामध्ये ५२ जना बालबालिका आजदेखि विद्यालय जाने भएका छन् ।
काठमाडौँ महानगरपालिकाको शिक्षा विभागले हिजो विद्यार्थी र अभिभावकसँग परामर्श गरेर उनीहरूको रुचि र आवश्यकता पहिचान गरेपछि आजदेखि वडा नं. १४ मा रहेको जनकल्याण माध्यमिक विद्यालयमा पठाउन लागिएको हो । यो विद्यालय, बालबालिका रहेको ठाउँबाट पैदल दूरीमा छ ।
नदी किनारामा अव्यवस्थित घरटहरा खाली गराउने क्रममा थापाथली, गैरीगाउँ र सिनामंगलसहित विभिन्न स्थानबाट ल्याइएका ६६ परिवारका २०३ जना अहिले राधास्वामी सत्संग आश्रममा छन् । उनीहरूमध्ये अपांगता भएका एकजनासहित ६२ पुरुष, तीन सुत्केरी र दुई गर्भवतीसहित ८० महिला, ३१ बालिका र ३० बालक छन् ।
यी परिवारमा रहेका बालबालिकामध्ये ५२ बालबालिका विद्यालय उमेरका छन् । चारजनाले यस वर्ष एसईई दिएका थिए । उनीहरू कम्प्युटर, सिलाइ बुनाइजस्ता सिप सिक्न चाहन्छन् । महानगरपालिकाले उनीहरूले चाहेको सिपमूलक तालिमको प्रबन्ध गर्ने योजना बनाएको शिक्षा अधिकारी नमराज ढकालले बताए ।
