काठमाडौँ, २१ बैशाख । नेपाल उद्योग वाणिज्य महासंघका अध्यक्ष चन्द्रप्रसाद ढकालले निजी क्षेत्रको सुरक्षा सुनिश्चित गर्न आग्रह गरेका छन् ।
नेपाल उद्योग वाणिज्य महासंघको ६०औँ साधारणसभामा अध्यक्ष ढकालले सरकारले निजी क्षेत्र प्रवर्द्धन एवं संरक्षण रणनीति पारित गरी तत्काल लागु गर्ने निर्णय गरेकोमा आभार व्यक्त गरे ।
अध्यक्ष ढकालले यो रणनीतिले उद्यमी र व्यवसायीहरूका लागि भौतिक सुरक्षाका साथै नीतिगत सुरक्षाको प्रत्याभूति गर्ने विश्वास गरे । महासंघकै आग्रहमा गठित उच्चस्तरीय आर्थिक सुधार आयोगको सुझावका आधारमा केही कानुनहरू खारेजीको प्रक्रियामा गइसकेको र यसले दोस्रो चरणको आर्थिक सुधारको मार्गचित्र तयार गर्ने उनले बताए ।
अध्यक्ष ढकालले महासंघको ६० वर्षको यात्रा मुलुकको आर्थिक इतिहासमा दृढ संकल्प र साझेदारीको परिणाम भएको बताए । यो संस्था निजी क्षेत्रको सशक्त आवाज र उद्योग, व्यापार एवं लगानीको वातावरण सिर्जना गर्ने अगुवाका रूपमा उभिएको उनको भनाइ छ ।
अध्यक्ष ढकालले नयाँ सरकारले महासंघको आग्रहबमोजिम ‘निजी क्षेत्र प्रवर्द्धन एवं संरक्षण रणनीति’ (पीएसपीपी) पारित गरेकोमा खुसी व्यक्त गरे । यो रणनीतिले निजी उद्यम र व्यवसायीलाई भौतिक एवं नीतिगत सुरक्षाको ग्यारेन्टी गर्ने उनले बताए । यस्तै, दोस्रो चरणको आर्थिक सुधारका लागि गठित उच्चस्तरीय आयोगका सुझावहरू कार्यान्वयन गर्ने क्रममा केही कानुन खारेज गर्ने सरकारको निर्णयलाई उनले सकारात्मक कदमका रूपमा लिए ।
