एजेन्सी, २० बैशाख । इरानले अमेरिकाले प्रस्तुत गरेको प्रस्तावमा १४ बुँदे प्रतिक्रिया दिएको छ ।
इरानको इस्लामिक रिभोल्युशनरी गार्ड कप्र्स (आईआरजीसी)सँग सम्बन्धित तस्निम समाचार एजेन्सीले शनिबार उक्त जानकारी दिएको हो । तस्निमका अनुसार इरानले आफ्नो प्रस्ताव पाकिस्तानी मध्यस्थमार्फत पठाएको हो । उक्त प्रस्तावमा लेबनानसहित सबै मोर्चामा जारी युद्ध अन्त्य गर्नुपर्ने माग समावेश गरिएको छ ।
समाचारमा जनाइएअनुसार अमेरिकाले दुई महिनाको युद्धविराम प्रस्ताव गरेको थियो । तर इरानले भने समस्याहरू ३० दिनभित्र समाधान गर्नुपर्ने र वार्ता युद्धविराम लम्ब्याउनेभन्दा पनि युद्धको पूर्ण अन्त्यमा केन्द्रित हुनुपर्ने धारणा राखेको छ ।
इरानी अधिकारीहरूले अहिलेसम्म उक्त प्रतिक्रियाको विस्तृत विवरण सार्वजनिक रूपमा खुलाएका छैनन् । अमेरिकी राष्ट्रपति डोनाल्ड ट्रम्पले शनिबार उक्त योजनाको समीक्षा गर्ने बताएका छन् । तर उनले यो स्वीकार्य हुने कल्पना गर्न गाह्रो भएको प्रतिक्रिया दिएका थिए । तस्निमका अनुसार यो प्रतिक्रिया अमेरिकाले अघि सारेको ९ बुँदे प्रस्तावको जवाफस्वरूप आएको हो । इरानको प्रस्तावमा सैन्य आक्रमण नगर्ने सुनिश्चितता, इरान वरपरका क्षेत्रमा रहेका अमेरिकी सैनिक फिर्ता गर्ने विषय समेटिएका छन् । यसका साथै, रोक्का गरिएका इरानी सम्पत्तिहरू मुक्त गर्ने, प्रतिबन्ध हटाउने, र स्ट्रेट अफ होर्मुजका लागि नयाँ संयन्त्र स्थापना गर्ने माग पनि प्रस्तावमा उल्लेख गरिएको छ ।
