काठमाडौँ, २० बैशाख । विराटनगर विमानस्थलमा प्रहरीले सुरक्षा जाँचका क्रममा दुई दिनको अवधिमा स्रोत नखुलेको करिब २७ लाख रुपैयाँसहित दुईजना यात्रुलाई नियन्त्रणमा लिएको छ ।
जिल्ला प्रहरी कार्यालय मोरङका अनुसार विराटनगरबाट जहाजमार्फत काठमाडौँ जान लागेका फरक–फरक एयरलाइन्सका यात्रुहरू झोलाभित्र अवैध नगद लुकाएको अवस्थामा फेला परेका हुन् । पक्राउ पर्नेहरूमा एक नेपाली र एक भारतीय नागरिक रहेका छन् ।
प्रहरीले पहिलो सफलता शुक्रबार बेलुका करिब ८ बजे प्राप्त गरेको थियो । बुद्ध एयरको उडानबाट काठमाडौँ प्रस्थान गर्न लागेका सुनसरीको धरान उपमहानगरपालिका वडा नम्बर १८ का ३५ वर्षीय दिलीप तामाङलाई सुरक्षाकर्मीले शंका लागेर चेकजाँच गरेका थिए । खानतलासीका क्रममा उनको ब्यागबाट स्रोत खुलाउन नसकेको ११ लाख नेपाली रुपैयाँ बरामद भएपछि उनलाई तत्काल नियन्त्रणमा लिइएको थियो ।
यो घटनाको भोलिपल्ट अर्थात् वैशाख १९ गते शनिबार दिउँसो पुनः अर्का एक यात्रु अवैध नगदसहित समातिए । श्री एयरलाइन्सको जहाजमार्फत काठमाडौँ जान लागेका भारतीय नागरिक ३६ वर्षीय मोहिदिल अलि पक्राउ परेका हुन् । भारतको माल्दा जिल्ला सुजा गञ्जका बासिन्दा अलिको झोला चेकजाँच गर्दा प्रहरीले १५ लाख ९८ हजार रुपैयाँ फेला पारेको थियो ।
प्रहरीले दुवै जनाबाट जम्मा २६ लाख ९८ हजार रुपैयाँ बरामद गरेको छ । पक्राउ परेका तामाङ र अलि दुवैलाई बरामद गरिएको रकमसहित थप अनुसन्धानका लागि जिल्ला प्रहरी कार्यालय मोरङमा राखिएको छ ।
