काठमाडौँ, १७ बैशाख । नेपाली कम्युनिष्ट पार्टी (नेकपा)का संयोजक पुष्पकमल दाहाल ‘प्रचण्ड’ले यसपटकको प्रतिनिधिसभा सदस्य निर्वाचन परिणाम असामान्य र अस्वाभाविक भएको बताएका छन् ।
आज रुकुम पूर्व पुगेका प्रचण्डले आयोजित पत्रकार भेटघाट कार्यक्रममा यसको अध्ययन, अनुसन्धान गर्नुपर्छ भन्ने नेकपाले निष्कर्ष निकालेको सुनाए । उनले भने, “अलि असामान्य र अस्वाभाविक भएको छ । परिणामजस्तो आएको छ, त्यो पनि कैयौँ ठाउँका रिपोर्टहरू सुन्दा सहज किसिमले आएको देखिँदैन ।”
“केही ठाउँमा उमेदवारहरूले आफैँले हालेको भोट पनि नपरेको जस्तो, कतिपय ठाउँमा जित्दै जित्दिनँ भनेकाले यति धेरै भोट मलाई कसरी आएको भनेका जस्ता, कतिपय ठाउँमा भोटहरू हाम्रा धेरै थिए, कता हराए भनेको जस्तो देखिन्छ ।”
विभिन्न खाले शंका, उपशंका देखिएपछि नेकपाले यो निर्वाचन असामान्य रहेको समीक्षा गरेको उनले बताए ।
