काठमाडौँ, ९ बैशाख । नेपालले युएईलाई टी–२० अन्तर्राष्ट्रिय शृङ्खलाको दोस्रो खेलमा ८ विकेटले हराएको छ । योसँगै नेपाल र यूएईबीचको दुई खेलको टी–२० शृङ्खला १–१ को बराबरीमा सकिएको छ ।
हिजो भएको दोस्रो खेलमा कुशल भुर्तेल र सन्दीप लामिछानेले उत्कृष्ट प्रदर्शन गरे । सन्दीप लामिछानेले ४ ओभरमा १ मेडनसहित मात्र ६ रन दिएर ३ विकेट लिए । उनले दुई खेलमा गरी ६ विकेट लिएका छन् ।
यस्तै हेमन्त धामीले ४ ओभरमा २० रन दिएर २ विकेट लिए । १२९ रनको लक्ष्य नेपालले १५ ओभर ५ बलमा २ विकेट गुमाएर पूरा गर्यो । कुशल भुर्तेलले ५७ बलमा ८४ रन बनाए । उनको यो अन्तर्राष्ट्रिय टी–२० मा १४औँ अर्धशतक हो ।
युएईका निलांश केशवानी र मुहम्मद अरफानले १/१ विकेट लिए । यसअघि नेपालले टस जितेर बलिङ गरेको थियो । युएईले २० ओभरमा ८ विकेट गुमाउँदै १२८ रन बनाएको थियो । पहिलो खेलमा नेपाल पराजित भएको थियो ।
