एजेन्सी, ७ बैशाख । इरानका सरकारी सञ्चारमाध्यमहरूले अमेरिकासँग हुने भनिएको वार्ता तत्कालका लागि नहुने सम्भावना देखिएको बताएका छन् ।
विशेषगरी इस्लामवादमा प्रस्तावित अर्को चरणको वार्तामा इरान सहभागी नहुने संकेत गरिएको छ । सरकारी टेलिभिजन आईआरआईबीले इरानी स्रोतहरूलाई उद्धृत गर्दै ‘अहिले अमेरिका–इरान वार्तामा सहभागी हुने कुनै योजना छैन’ भनेको छ । यसैबिच फार्स न्युज एजेन्सी र तास्निम न्युज एजेन्सीले पनि वार्ताको वातावरण सकारात्मक नभएको जनाएका छन् ।
उनीहरूका अनुसार अमेरिकाले लगाएको नाकाबन्दी हटाउनु नै वार्ताको प्रमुख सर्त हो । सरकारी समाचार संस्था आईआरएनएले पनि अमेरिकाको ‘अवास्तविक र अनुचित माग’ का कारण हालको अवस्थामा सार्थक वार्ताको सम्भावना नदेखिएको भनेको छ ।
रिपोर्टअनुसार पछिल्ला तनावहरू अझ बढेका छन् । विशेष गरी अमेरिकी सैन्य कारबाही र इरानी जहाज र बन्दरगाहमा नियन्त्रण सम्बन्धी घटनापछि परिस्थिति जटिल बनेको बताइएको छ ।
