काठमाडौँ, ७ बैशाख । फिल्म ‘धुरन्धर २’ ले बक्स अफिसमा विश्वव्यापी तहल्का मच्चाएको छ ।
प्रदर्शनको ३१ औँ दिनसम्म आइपुग्दा यस फिल्मले विश्वभरबाट १ हजार ७४८.९१ करोड भारु कमाउँदै नयाँ इतिहास रचेको हो।
यससँगै धुरन्धर २ ले अल्लु अर्जुनको ब्लकबस्टर फिल्म ‘पुष्पा २’ (१,७४२.१० करोड) लाई पछि पार्दै विश्वभर सबैभन्दा धेरै कमाउने तेस्रो भारतीय फिल्मको उपाधि हासिल गरेको छ ।
अब यो फिल्मभन्दा अगाडि आमिर खानको ‘दंगल’ (२०७० करोड) र प्रभासको ‘बाहुबली २’ (१,७८८.०६ करोड) मात्र रहेका छन्। फिल्मको अहिलेको रफ्तार हेर्दा यसले चाँडै नै ‘बाहुबली २’ को रेकर्डलाई समेत चुनौती दिने देखिएको छ ।
ट्रेड वेबसाइट सैकनिल्कका अनुसार रिलिजको पाँचौँ हप्तामा प्रवेश गर्दा फिल्मको कमाइमा केही गिरावट आए पनि सप्ताहान्तमा भने उत्साहजनक वृद्धि देखिएको छ। ३० औँ दिनमा २.७० करोड कमाएको फिल्मले ३१ औँ दिनमा ४.६५ करोडको नेट कलेक्सन गरेको छ। भारतमा मात्रै यसको कुल नेट कलेक्सन १,११०.४७ करोड पुगेको छ भने ग्रॉस कलेक्सन १,३२९.३१ करोड पुगिसकेको छ।
