काठमाडौँ, २ चैत । चलचित्र ‘पाँच पाण्डव’को छायांकन सुरु भएको छ ।
आज काँकडभिट्टाबाट चलचित्रको छायांकन थालिएको हो । चलचित्रमा हरिवंश आचार्य, जितु नेपाल, आर्यन सिग्देल, महेश त्रिपाठी र सागर लम्साल (बले) रहनेछन् । ‘पाँच पाण्डव’को भूमिकामा यी कलाकार रहनेछन् ।
चलचित्रको शीर्षक ‘पाँच पाण्डव’ राखिए पनि यो कुनै धार्मिक वा पौराणिक कथामा आधारित सिनेमा भने होइन । निर्माण पक्षका अनुसार यो पूर्ण रूपमा एक ‘सोसल ड्रामा’ (सामाजिक कथा) हो । चलचित्रमा महाभारतका पाँच पाण्डवको बिम्वलाई प्रयोग गर्दै समकालीन समाजको कथा भन्न खोजिएको छ ।
निर्माणपक्षले दिएको जानकारी अनुसार ‘पाँच पाण्डव’को महिला पात्रमा दीपाश्री निरौला र जेनी गुरुङ रहनेछन् ।
चलचित्रलाई निर्देशक वसन्त निरौलाले निर्देशन गर्दैछन् । सुशील पौडेलले यसको कथा, पटकथा तथा संवाद लेखेका छन् ।
