काठमाडौँ, १३ फागुन । चलचित्र विकास बोर्डले नेपाली चलचित्र संग्रहालयको औपचारिक सुरुवात गरेको छ ।
नेपाली चलचित्रको इतिहास, कला र प्रविधिलाई भावी पुस्तासम्म सुरक्षित गर्ने उद्देश्यसहित मंगलबार बोर्डले सञ्चार तथा सूचना प्रविधि मन्त्रालयका सचिव लक्ष्मीकुमारी बस्नेतको उपस्थितिमा संग्रहालय उद्घाटन गरेको हो ।
कार्यक्रममा चलचित्रकर्मी तथा विभिन्न संस्थाहरूले ऐतिहासिक क्यामेरा, क्यासेट, टेप, पोस्टर, आर्टवर्क, स्क्रिप्ट तथा संग्रहयोग्य कागजात हस्तान्तरण गरेका थिए ।
संग्रहालयलाई समृद्ध बनाउन विभिन्न क्षेत्रका चलचित्रकर्मी तथा संस्थाहरूले महत्वपूर्ण योगदान दिएका छन् । सिने फोकस प्रा.लि. (रजत बुढाथोकी)ले रेड क्यामेरा हस्तान्तरण गरेका छन् ।
क्लासिक सिने युनिभर्स प्रा.लि. (दिनेश महरा)ले सोनी इएक्स–३ क्यामेरा उपलब्ध गराएका छन् । चलचित्र सम्पादक मानबहादुर थापाले सन् १९८० को पानासोनिक एफ–१० क्यामेरा, सोनी कलर मोनिटर (२००१), नेशनल पानासोनिक ५४३ क्यासेट टेप, साउन्ड/भिडियो उपकरण तथा अडियो मिक्सर उपलब्ध गराएका छन् ।
म्युजिक नेपालका प्रबन्ध निर्देशक उत्तम थापाले १५२ वटा नेपाली चलचित्रका पोस्टर तथा आर्टवर्क प्रदान गरेका छन् । ओ.एस.आरका रुपेन्द्र खड्गीले चलचित्र आर्टवर्कहरू उपलब्ध गराएका छन् ।
