काठमाडौँ, २६ माघ । स्पेन सरकारले करिब २२ वर्षपछि एकैपटक झन्डै पाँच लाख आप्रवासीलाई अस्थायी बसोबास अनुमति (टिआरसी) तथा रोजगारीको अवसर प्रदान गर्ने निर्णय गरेपछि स्पेनमा बसोबास गर्दै आएका हजारौँ नेपाली उत्साहित भएका छन् ।
तर सो अवसरका लागि आवश्यक कागजातका रूपमा नयाँ राहदानी अनिवार्य गरिएपछि नेपाली आप्रवासी गम्भीर समस्यामा परेका छन् ।
स्पेनमा बसोबास गर्दै आएका रजिन्द्र बस्नेतले जारी गरेको सार्वजनिक विज्ञप्तिमा नेपाल सरकारसँग यथाशीघ्र पहलको माग गरिएको छ । विज्ञप्तिमा भनिएको छ, ‘हामी जुन देशमार्फत स्पेन आएका हौँ, त्यही देशको प्रहरी रिपोर्ट पेस गर्नुपर्ने व्यवस्था छ । तर उक्त रिपोर्ट झिकाउन असमर्थ भएकाले हामीलाई नयाँ राहदानी अत्यावश्यक भएको छ ।’
बस्नेतका अनुसार भारत, पाकिस्तान र बङ्गलादेशले आफ्ना नागरिकका लागि स्पेनका विभिन्न सहरहरूमा घुम्ती शिविर सञ्चालन गरी नयाँ राहदानी उपलब्ध गराइसकेका छन् । तर नेपाली नागरिक भने त्यस्तो सुविधा नपाउँदा अन्योलमा परेका छन् ।
विज्ञप्तिमा भनिएको छ, ‘बरु हाम्रो कागज बनेर रोजगारी पाएपछि पहिलो महिनाको तलब नेपाल सरकारलाई दान दिनेछौँ, अर्को महिना ऋण गरेर वा गुरुद्वारामा प्रसादी खाएर बाँच्न तयार छौँ, तर हामीलाई नयाँ राहदानी देऊ।’
