काठमाडौँ, ३ माघ । नेपाली क्रिकेट टिमका कप्तान रोहित पौडेलले आगामी टी-२० विश्वकपका लागि राम्रो तयारी भएको बताएका छन् ।
आज बिदाइ कार्यक्रमपछि कुरा गर्दै उनले बिल्डअप राम्रो भएको बताएका हुन् । उनले भने, ‘बिल्डअप राम्रो छ । हामी उत्साहित छौं, टिम पनि सन्तुलित छ’ ‘पछिल्लो एक हप्ता एक्स्ट्राटेक ओभलमा तयारी गरेका थियौं । मुम्बईको पिच कन्डिशनसँग मिल्ने भएर राम्रो तयारी भएको छ । ब्याटिङ, बलिङ फिल्डिङ सबै पक्षमा राम्रो तयारी गरिरहेका छौं ।’
गत संस्करण अमेरिका र वेस्ट इन्डिजमा भएको विश्वकपमा नेपाल मात्र नभएर सबै टिमलाई कठिन अवस्था भएको तर यसपटक भारतमा राम्रो कन्डिशन हुने उनले बताए । ‘अघिल्लोपटक सबै टिमलाई कठिन देखिएको थियो । विकेट च्यालेन्जिङ थियो । भारतमा राम्रो हुन्छ पिच र कन्डिशन’ कप्तान रोहितले भने ।
